Në Gjykatën Themelore në Prishtinë, Millosh Maksimoviq dhe Sinisha Nedeljkoviq u deklaruan të pafajshëm për akuzën e prodhimit dhe kultivimit të narkotikëve, ndërsa Nedeljkoviq pranoi fajësinë për armëmbajtje pa leje. Prokuroria speciale pretendon se ata kanë kultivuar mbi 10 mijë bimë kanabis në pronën familjare në fshatin Rudine, ndërsa mbrojtësit e tyre kundërshtojnë provat, duke theksuar se ato mbështeten kryesisht në dëshmi të policisë. Në seancë u dëgjua dëshmitari Goran Sankoviq, i cili mohoi të ketë qenë pranë laboratorit të dyshuar. Gjykata miratoi pranimin e fajësisë për armëmbajtjen pa leje dhe njoftoi se vendimi për këtë pikë do të merret në fund të shqyrtimit gjyqësor.