Mëngjesin e së enjtes në kantonin e Cyrihut, dy të rinj algjerianë, 25 dhe 26 vjeç, humbën jetën në një aksident tragjik me motoçikletë. Ata po iknin nga policia pasi drejtuesi po drejtonte pa helmetë dhe me manovra të rrezikshme, ndërsa motoçikleta ishte raportuar e vjedhur në kantonin e Zugut gjatë natës. Policia u përpoq t’i ndalonte me sinjale emergjente dhe panel elektronik, por shoferi nuk iu bind dhe vazhdoi drejt Cyrihut. Në hyrje të zonës së pushimit në Oberengstringen, motoçikleta goditi një pengesë anësore, u përplas me një rimorkio kamioni dhe më pas rrëshqiti nën një kamion tjetër, duke shkaktuar vdekjen e menjëhershme të të dyve. Hetimet për rrethanat e aksidentit vazhdojnë nga autoritetet zvicerane.