Pas arrestimit në flagrancë të ndihmësdrejtorit të Drejtorisë së Doganave për marrje ryshfeti prej 17.500 eurosh, BDI kërkon sqarime të menjëhershme nga policia lidhur me praninë e veturës së zv.drejtorit Mustafa Dauti në vendin e ngjarjes. Partia pyet nëse është e vërtetë që kjo veturë ndodhej menjëherë pas makinës së të arrestuarit dhe kërkon të dihet kush ndodhej në të, si dhe arsyet e pranisë së saj në momentin e arrestimit. BDI kërkon gjithashtu të sqarohet nëse Mustafa Dauti ose personat në veturën e tij janë marrë në pyetje dhe nëse rasti i ryshfetit lidhet me persona të tjerë brenda hierarkisë së Drejtorisë së Doganave. Sipas BDI-së, hetimi nuk duhet të ndalet vetëm tek personi i kapur në flagrancë, por duhet të zbardhet i gjithë zinxhiri i përfshirë në këtë skandal, ndërsa MPB dhe Prokuroria kanë detyrimin të japin përgjigje të plota dhe transparente për opinionin publik.