Në gjyqin për vdekjen e Diego Maradonës është shënuar një kthesë e rëndësishme, pasi mbrojtja ka vënë në dyshim përkatësinë e disa dokumenteve mjekësore të paraqitura si prova. Avokati i infermieres Nancy Forlini pretendoi se disa analiza për veshkat nuk i përkisnin Maradonës, por babait të tij, dhe se ato datonin nga viti 2015, periudhë kur Maradona ishte kryesisht në Dubai. Për shkak të këtyre pretendimeve, gjykata vendosi të shtyjë seancën deri më 27 gusht për të verifikuar vërtetësinë e dokumenteve. Në proces janë shtatë të pandehur, përfshirë mjekë dhe kujdestarë, të akuzuar për neglizhencë kriminale në kujdesin ndaj legjendës së futbollit, ndërsa mbrojtja argumenton se gjendja e rëndë shëndetësore e Maradonës ishte shkaku i vdekjes së tij.