Rrjeti i Organizatave Joqeveritare AVONET ka kërkuar nisjen e hetimeve për diplomat dhe certifikatat e lëshuara nga Qendra “AFTËSIMI” në Prizren, pasi ka dyshime mbi bazën ligjore të funksionimit të këtij subjekti. Autoriteti Kombëtar i Kualifikimeve ka konfirmuar se “AFTËSIMI” nuk ka qenë dhe nuk është i akredituar, duke hedhur dyshime mbi vlefshmërinë e dokumenteve të lëshuara prej tij. Gjatë hetimit është zbuluar se këto diploma dhe certifikata janë përdorur si dëshmi për kualifikim profesional në një procedurë prokurimi publik, ku operatori ekonomik me këto dokumente është shpallur fitues. AVONET ka njoftuar se do t’u drejtohet organeve të zbatimit të ligjit për të hetuar nëse ka elemente të veprave penale si mashtrimi dhe falsifikimi i dokumenteve, ndërsa kërkon veprime urgjente nga Prokuroria dhe Policia për zbardhjen e plotë të rastit.