Në tenderin për furnizim me karburante në rajonet e Pejës dhe Gjakovës, kompania IP-KOS ka përdorur një dokument të paraqitur si garanci nga BP Oil International Limited, i cili tashmë është mohuar nga vetë BP-ja. Sipas përgjigjes së departamentit ligjor të BP-së, dokumenti nuk është autentik dhe kompania po ndërmerr hapa ligjorë për këtë çështje, duke ngritur dyshime serioze për falsifikim dhe përdorim të paautorizuar të identitetit korporativ. Dokumenti mban emrin e një ish-zyrtari të BP-së, i cili sipas pretendimeve nuk ka pasur më funksion në kompani në kohën e lëshimit të letrës, dhe mungojnë elemente që vërtetojnë autorizimin e tij. Pavarësisht këtyre dyshimeve, Agjencia Qendrore e Prokurimit e ka shpallur IP-KOS-in fituese, por tani rasti është dorëzuar në organet e hetuesisë për zbardhjen e plotë të skandalit.