Ministrja në detyrë e Mjedisit dhe Planifikimit Hapësinor, Fitore Pacolli, ka përshëndetur aksionin e Prokurorisë Themelore në Prishtinë në Agjencinë Kadastrale të Kosovës, duke e cilësuar atë të vonuar, por të mirëpritur dhe me mbështetje të plotë. Aksioni u ndërmor për të hetuar dyshimet serioze për abuzime dhe krim të organizuar në tjetërsimin e pronave publike, ku mijëra hektarë janë kaluar përmes procedurave të dyshimta. Prokuroria ka njoftuar se disa persona dyshohen për keqpërdorim detyre, falsifikim dokumentesh dhe legalizim të përmbajtjes së pavërtetë, duke përdorur kontrata të falsifikuara për përfitime të kundërligjshme. Ministria është angazhuar për bashkëpunim të plotë me institucionet e drejtësisë dhe ka ndërmarrë hapa konkretë, përfshirë emërimin e drejtorit të ri dhe rishikimin e rasteve të dyshimta, në luftën kundër keqpërdorimit të pronës publike pa asnjë kompromis.