Një vajzë e mitur 14-vjeçare nga Gjakova ka denoncuar babanë e saj për dhunë fizike pas një mosmarrëveshjeje lidhur me përdorimin e rrjeteve sociale. Ngjarja ka ndodhur më 23 mars rreth orës 23:30 në rrugën “Ahmet Korenica”, ku i dyshuari 47-vjeçar i ka marrë telefonin vajzës, i ka fshirë aplikacionin Snapchat dhe më pas e ka goditur me shuplaka në kokë. Viktima është dëgjuar në prani të zyrtarëve të Qendrës për Punë Sociale dhe rasti është trajtuar me prioritet për shkak të moshës së saj. I dyshuari është arrestuar dhe intervistuar në prani të avokatit mbrojtës, por më pas është liruar në procedurë të rregullt me udhëzim të Prokurorit të Shtetit, ndërsa hetimet për dhunën në familje vazhdojnë.