Rasti i njohur si “Sarajeva Safari”, ku pretendimet flasin për gjuetinë e njerëzve gjatë rrethimit të Sarajevës në vitet 1992-1996, nuk mund të mbyllet vetëm me artikuj apo dokumentarë mediatikë. Drejtori i Institutit “Octopus”, Arben Fetoshi, thekson se e vërteta duhet të dalë nga hetimet penale që po zhvillohen nga Prokuroria e Milanos dhe bashkëpunëtorët e saj evropianë, duke mos lejuar që debati të reduktohet në nivelin e raportimeve mediatike. Ai vlerëson se pamjet që përfshijnë edhe presidentin serb Aleksandar Vuçiq janë bindëse, por provimi i përfshirjes së tij është shumë i vështirë. Hetimet janë të ndërlikuara dhe zgjaten për shkak të kompleksitetit të provave, ndërsa krimet e pretenduara në këtë ngjarje mbeten një çështje serioze juridike dhe morale që nuk duhet nënvlerësuar.