Instituti Kombëtar i Shëndetësisë Publike të Kosovës (IKSHPK) njofton se aktualisht në Kosovë nuk ka asnjë rast të konfirmuar të Ebolës dhe rreziku për popullatën mbetet shumë i ulët. Megjithatë, për shkak të situatës epidemiologjike në Republikën Demokratike të Kongos dhe Ugandë, ku janë raportuar qindra raste dhe disa vdekje, IKSHPK ka publikuar rekomandime të detajuara për udhëtarët që planifikojnë të shkojnë ose kthehen nga këto vende. Udhëtarët këshillohen të shmangin kontaktin me gjakun dhe lëngjet trupore, të mbajnë higjienën e duarve, të evitojnë kontaktin me kafshët e egra dhe marrëdhëniet seksuale të pambrojtura, si dhe të monitorojnë shëndetin për 21 ditë pas kthimit. Ebola është një sëmundje virale serioze, që transmetohet përmes kontaktit të drejtpërdrejtë me persona ose kafshë të infektuara, ndërsa aktualisht nuk ka vaksinë ose trajtim specifik për virusin Bundibugyo që po përhapet në Afrikë.