Eksperti i kriminalistikës holandez, Koen Herlaar, ka deklaruar në Dhomat e Specializuara të Kosovës në Hagë se Prokuroria i kërkoi ekzaminimin e një dokumenti mbi bazën e mikropikave për të përcaktuar printerin nga i cili është bërë kopja. Ai tha se nga dhjetë faqet e dokumentit janë ekzaminuar vetëm tri, ndërsa shtatë të tjera nuk janë analizuar, duke mos mundur të konfirmojë nëse ato janë printuar nga i njëjti printer. Dëshmia e Herlaarit u zhvillua kryesisht në seancë private dhe u përqendrua në pyetjet e avokatit të Bashkim Smakajt, i cili kërkoi sqarime mbi kufizimet e ekzaminimit. Ky dëshmitar është i dyti që dëgjohet në gjykimin ndaj Hashim Thaçit, Bashkim Smakajt, Isni Kilajt, Fadil Fazliut dhe Hajredin Kuçit, të akuzuar për pengim të drejtësisë, ndërsa të pandehurit janë deklaruar të pafajshëm dhe kanë kundërshtuar provat e Prokurorisë.