Në një operacion të koordinuar ndërkombëtar, Policia e Kosovës ka realizuar ekstradimin e katër personave të shpallur në kërkim ndërkombëtar përmes INTERPOL. Më 14 prill 2026, nga Hungaria është ekstraduar një shtetas kosovar me inicialet Q.I., i cili iu dorëzua njësive policore në rajonin e Gjakovës për procedura të mëtejshme ligjore. Më 15 prill 2026, nga Shqipëria janë ekstraduar dy shtetas shqiptarë, R.B. dhe G.H., të cilët iu dorëzuan Drejtorisë për Hetimin e Trafikimit me Njerëz për ndjekje ligjore. Në të njëjtën ditë, nga Mali i Zi është ekstraduar një tjetër shtetas kosovar me inicialet I.A., i cili iu dorëzua njësive policore në rajonin e Mitrovicës. Të dyshuarit ishin arrestuar më parë në vendet përkatëse, ndërsa ekstradimet u kryen në përputhje me ligjet dhe falë bashkëpunimit ndërinstitucional mes Kosovës dhe shteteve partnere.