Në kuadër të operacionit ndërkombëtar “The Wanted”, është finalizuar procedura e ekstradimit nga Dubai drejt Shqipërisë e shtetasit Durim Bami, 47 vjeç, banues në Nikël, Krujë. Ai ishte arrestuar në Emiratet e Bashkuara Arabe dhe pritet të mbërrijë në Shqipëri gjatë ditës së sotme. Gjykata e Posaçme e Shkallës së Parë Kundër Korrupsionit dhe Krimit të Organizuar i ka caktuar masën e sigurisë “Arrest në burg” që më 15 maj 2024, për veprat penale të sigurimit të kushteve për kryerjen e vrasjeve, pjesëmarrjes në grup të strukturuar kriminal, kultivimit të bimëve narkotike dhe kryerjes së veprave penale nga organizata kriminale. Ky ekstradim është rezultat i bashkëpunimit të ngushtë ndërkombëtar për kapjen e personave të shpallur në kërkim ndërkombëtar.