Në disa komuna të Shkupit, përfshirë Kisella Voda, Gazi Babë, Aerodrom, Butel dhe Ilinden, si dhe në vendbanimet Draçevë, Përzhinë, Lisiçe e Poshtme, Kadino dhe Jurumleri, është shpallur epidemi për shkak të përhapjes së "Etheve të Nilit Perëndimor". Autoritetet shëndetësore theksojnë se kjo sëmundje nuk është e re, por për shkak të situatës epidemiologjike dhe numrit të rritur të rasteve, është kërkuar një reagim më i fuqishëm institucional. Qeveria dhe institucionet shëndetësore po monitorojnë situatën në koordinim të ngushtë me institucionet përkatëse, duke synuar identifikimin dhe trajtimin në kohë të rasteve, si dhe parandalimin e përhapjes së mëtejshme. Publiku është apeluar për kujdes dhe përgjegjësi personale, duke u këshilluar të përdorin masa mbrojtëse dhe të shmangin zonat me mushkonja për të minimizuar rrezikun.