Familja e së ndjerës Liridona Ademaj, përmes vëllait të saj Leonard Ademaj, ka bërë apel të fortë ndaj mediave dhe administratorëve të rrjeteve sociale që të mos publikojnë pamjet e rënda të transmetuara gjatë seancës gjyqësore. Këto pamje, sipas familjes, janë të rëndësishme vetëm për procesin gjyqësor dhe jo për publikun, pasi cenojnë dinjitetin e viktimës dhe mund të kenë pasoja emocionale për fëmijët e saj në të ardhmen. Leonard Ademaj thekson se familja dëshiron që fëmijët ta mbajnë në mend nënën e tyre ashtu siç e kanë njohur kur ka qenë gjallë, pa u ekspozuar ndaj këtyre pamjeve të dhimbshme në hapësirën online. Gjykimi ndaj të akuzuarve për vrasjen e Liridona Ademajt vazhdon në Gjykatën themelore në Prishtinë, ku gjatë seancës janë paraqitur edhe pamje nga vendi i ngjarjes dhe objektet që viktima kishte me vete natën kritike, ndërsa njëri prej të akuzuarve mohon përfshirjen e tij duke pretenduar se ishte pre e grabitjes.