Osman Selmani, shtetas i Kosovës, është arrestuar në Serbi më 1 korrik nën dyshimin për krime lufte të kryera në qershor të vitit 1999 në Kosovë. Ai ndodhet në paraburgim në Beograd për muajin e dytë, ndërsa familja e tij mohon akuzat duke i cilësuar si të pabazuara dhe pa prova të mjaftueshme. Sipas familjes, dokumente të siguruara nga Komiteti i Kryqit të Kuq të Maqedonisë dhe një deklaratë nga organizata humanitare “Nëna Terezë” në Resnjë dëshmojnë se Selmani dhe familja e tij ishin refugjatë në Maqedoninë e Veriut në kohën kur pretendohet se ka ndodhur vepra penale. Familjarët shpresojnë që gjykata në Beograd të marrë parasysh këto dëshmi dhe të vendosë drejtësisht, duke i mundësuar Osman Selmanit kthimin pranë familjes së tij.