Një familje kosovare me tre fëmijë u bllokua për disa orë në borë në zonën neutrale mes Kosovës dhe Malit të Zi për shkak të reshjeve të dendura që bllokuan rrugën rajonale Kullë–Rozhajë. Pas një thirrjeje emergjente nga Policia Rajonale e Pejës, Shërbimi i Kërkim-Shpëtimit Malor i Kosovës (ShKShMK) dërgoi një ekip me pajisje specialistike, përfshirë një motosajë, për të evakuuar familjen dhe personat e tjerë të bllokuar në atë zonë. Gjendja shëndetësore e familjes u vlerësua dhe ata u dërguan në një zonë të sigurt në Pikën Kufitare Kullë. Në operacion u përfshi edhe evakuimi i një shoferi kamioni me shtetësi malazeze, i cili u dorëzua autoriteteve të Malit të Zi, ndërsa shpëtimi u realizua në bashkëpunim me Policinë e Kosovës dhe Zjarrfikësit e Pejës.