Në kuadër të 27-vjetorit të Policisë së Kosovës, po zhvillohet projekti “Rreze drite në emblemën time” që synon të afrojë fëmijët me Policinë dhe të promovojë vlerat e bashkëpunimit, respektit dhe sigurisë. Ky projekt realizohet në të gjitha drejtoritë rajonale policore dhe u jep fëmijëve mundësinë të shprehin kreativitetin e tyre duke parë emblemën e Policisë si simbol të shërbimit dhe përkushtimit ndaj qytetarëve. Përveç kësaj, fëmijët kanë mundësi të veshin uniformën e Policisë, duke u njohur më nga afër me punën e zyrtarëve policorë. Policia e Kosovës thekson se ky aktivitet është një hap i rëndësishëm në ndërtimin e marrëdhënieve të qëndrueshme me komunitetin dhe edukimin e brezave të rinj për një shoqëri më të sigurt.