Gjatë dy ditëve të fundit, rajone të ndryshme të Kosovës u përballën me mot të paqëndrueshëm, duke përfshirë erëra të forta, reshje intensive shiu dhe breshër që shkaktuan dëme në kultura bujqësore, objekte banimi dhe rrjetin elektrik. Në këtë kontekst, u vërejt një fenomen atmosferik i veçantë i njohur si “Shelf clouds”, që formohen kur ajri i ftohtë dhe i dendur shtyhet me forcë drejt ajrit më të ngrohtë, duke krijuar front me erëra të fuqishme. Këto re shoqërohen zakonisht me valë ajri të ftohtë dhe të thatë, duke paralajmëruar për stuhitë që po zhvillohen në afërsi, dhe shpesh shoqërohen me erëra të forta, reshje të dendura dhe breshër të madh. Ndërsa vetë “Shelf clouds” nuk shkaktojnë mot ekstrem, ato janë tregues të një moti të trazuar dhe mund të sinjalizojnë rreziqe të mëdha për zonat përreth.