Inspektorati Komunal në Ferizaj ka vijuar aksionet për ndëshkimin e personave që nuk respektojnë rregullat e menaxhimit të mbeturinave, duke shqiptuar katër gjoba të reja në disa zona të qytetit. Kontrolli është fokusuar në rrugët “Qamil Ilazi”, “12 Qershori”, “Gjon Serreci” dhe “Uran Tinova”, ku janë evidentuar qytetarë që hedhin mbeturina jashtë orarit dhe jashtë kontejnerëve të përcaktuar. Kryeinspektori Feriz Hyseni ka bërë apel për përgjegjësi dhe kujdes në hedhjen e mbeturinave, veçanërisht gjatë sezonit veror, për të parandaluar përhapjen e sëmundjeve dhe për të mbrojtur shëndetin publik. Aksionet e inspektoratit synojnë të rrisin ndërgjegjësimin dhe të mbajnë ambientin e qytetit të pastër dhe të shëndetshëm.