Gjatë javës së kaluar, Policia Rajonale e Ferizajt ka shqiptuar 1,511 gjoba kundërvajtëse dhe ka pezulluar 43 patentë shoferësh për shkelje të rënda të rregullave të trafikut. Në të njëjtën periudhë, në rajon janë regjistruar 42 aksidente, prej të cilave 23 kanë rezultuar me persona të lënduar, duke lënë 31 të plagosur, ndërsa 19 kanë përfunduar vetëm me dëme materiale. Policia ka intensifikuar aktivitetet për parandalimin e aksidenteve dhe ka bërë apel për kujdes dhe respektim të rregullave nga ana e shoferëve. Gjithashtu, qytetarët janë ftuar të bashkëpunojnë duke raportuar kundërvajtjet përmes stacioneve policore, aplikacionit digjital “Lajmëro Policinë” ose numrit 192, në përpjekje për të rritur sigurinë në komunikacion.