Një fermer nga zona ka protestuar ndaj mbylljes së qumështores “Vita” në Istog duke derdhur qumësht në lumin Bistrica, i cili furnizon me ujë Liqenin e Radoniqit. Kompania Rajonale e Ujësjellësit “Gjakova” ka ndërprerë përkohësisht mbushjen e liqenit nga kanali furnizues, për shkak të rrezikut që qumështi paraqet për cilësinë e ujit të pijshëm. Ekspertët e kompanisë theksuan se qumështi rrit ngarkesën organike, favorizon shumimin e baktereve dhe mund të shkaktojë formimin e substancave të dëmshme gjatë dezinfektimit. Përveç ndërprerjes së furnizimit, KRU “Gjakova” ka njoftuar Policinë e Kosovës dhe do të ngrejë padi ndaj fermerit, duke bërë apel që pakënaqësitë të shprehen në mënyrë ligjore për të mbrojtur interesin publik dhe mbi 200 mijë banorët që varen nga uji i këtij liqeni.