Në Fier vijon beteja e vështirë me zjarret që kanë përfshirë gjashtë fshatra, duke rrezikuar banesa dhe biznese. Era e fortë ka favorizuar përhapjen e flakëve në Fermë Çlirim, Radostinë, Levan, Peshtan i Vogël, Frakull dhe Zhupan, ndërsa ndërhyrja gjatë natës u vështirësua nga errësira dhe terreni i thyer. Situata më kritike është në kodrat e Levanit dhe Radostinës, ku flakët avancojnë drejt Peshtanit, ndërsa në Frakull zjarri ka përfshirë një masiv me pisha, duke krijuar tym të dendur. Me zbardhjen e ditës, në terren janë angazhuar 90 ushtarë të Forcave të Armatosura dhe 7 mjete zjarrfikëse, ndërsa ka nisur edhe ndërhyrja nga ajri për të izoluar dhe kontrolluar flakët.