Prokuroria Speciale e Kosovës ka ngritur aktakuzë ndaj 21 personave për masakrën e Reçakut, ku më 15 janar 1999 u vranë 42 civilë. Aktakuza përmbledh detaje të rënda mbi vrasjet mizore, trajtimin çnjerëzor, dëbimet dhe shkatërrimin e pasurisë së civilëve nga forcat policore dhe ushtarake serbe. Sipas dokumentit, forcat serbe rrethuan fshatin në mëngjes, e granatuan nga disa pika dhe më pas hynë me automjete të blinduara duke kontrolluar shtëpi për shtëpi. Në mesin e dëshmive të rëndësishme është edhe ajo e ish-shefit të Misionit Verifikues të OSBE-së në Kosovë, William Walker, që konfirmon ngjarjet e përshkruara.