Një zjarr i madh ka përfshirë rreth një hektar në fshatin Derstil, në Njësinë Administrative Gjinar të Elbasanit, duke u përhapur shpejt nga një grumbull mbetjesh dhe duke iu afruar banesave dhe bizneseve në zonë. Situata u bë kritike kur flakët iu afruan një banese ku jetonte një e moshuar dhe një biznesi pranë vatrës së zjarrit, ndërsa banorët ndërhynë fillimisht për të mbrojtur pronat e tyre. Më pas, zjarrfikësit mbërritën në vendngjarje dhe punuan për izolimin dhe shuarjen e zjarrit, duke arritur ta mbajnë situatën nën kontroll. Aktualisht, ata vazhdojnë punën për shuarjen përfundimtare dhe parandalimin e riaktivizimit, ndërsa autoritetet do të hetojnë shkaqet e rënies së zjarrit.