Një zjarr i madh ka përfshirë kodrat e Myselimit dhe Bardhajve në Shkodër, duke rrezikuar banesat pranë vatrës së zjarrit. Përhapja e flakëve është favorizuar nga era e fortë dhe terreni i thyer, që kanë lehtësuar përhapjen e zjarrit në sipërfaqet me bimësi. Në operacionin e shuarjes janë angazhuar forca të shumta zjarrfikëse, strukturat e emergjencave civile, shërbimi pyjor dhe njësitë administrative lokale, ndërsa ndërhyrja po bëhet edhe nga ajri me helikopter. Falë këtyre përpjekjeve, deri tani janë mbrojtur 15 banesa dhe po punohet intensivisht për izolimin e plotë të vatrave dhe parandalimin e përhapjes së mëtejshme të zjarrit drejt zonave të banuara.