Në Maqedoninë e Veriut janë regjistruar gjithsej 31 zjarre në hapësira të hapura deri në orën 07:30 të ditës së sotme, njofton Qendra për Menaxhim me Kriza. Nga këto, dy zjarre mbeten ende aktive, duke përfshirë një vatër në fshatin Graçan të Komunës së Gjorçe Petrovit, ku flakët kanë kaluar edhe në territorin e Kosovës. Një tjetër zjarr aktiv ndodhet në zonën Kajorec pranë fshatit Belicë në Komunën e Makedonski Brodit. Pesë zjarre të tjera janë nën kontroll në rajonet e Strugës, Sarajt, Çuçer-Sandevës, Kratovës dhe Dellçevës, ndërsa 24 zjarret e mbetura janë shuar. Situata mbetet e ndjeshme për shkak të përhapjes së flakëve në zona të ndryshme dhe kalimit të tyre nëpër kufi.