Sot në ishullin Korçula të Kroacisë shpërthyen dy zjarre të mëdha, të cilat dyshohet se u shkaktuan nga goditjet e rrufeve. Flakët përfshinë zonën mes Blatës dhe Smokvicës, duke vënë në alarm ekipet zjarrfikëse që po punojnë intensivisht për shuarjen e tyre. Për shkak të terrenit të vështirë dhe të paarritshëm, në operacion u përfshinë edhe avionët zjarrfikës Canadair, të cilët ndihmojnë nga ajri në luftën kundër zjarrit. Autoritetet kanë mbyllur një pjesë të rrugës në zonën e prekur dhe vazhdojnë përpjekjet për të parandaluar përhapjen e mëtejshme të flakëve, ndërsa ende nuk janë bërë të ditura përmasat e dëmit.