Një zjarr masiv ka përfshirë pyllin e Semanit pranë grykëderdhjes së lumit Seman, ku janë identifikuar katër vatra aktive zjarri. Flakët po përhapen me shpejtësi, të favorizuara nga era e fortë që po e përshpejton përparimin drejt masivit pyjor me pisha, duke vështirësuar ndërhyrjen e zjarrfikësve. Forcat zjarrfikëse të Fierit ndodhen në vendngjarje dhe po punojnë intensivisht për izolimin dhe shuarjen e flakëve, duke u përpjekur të parandalojnë përhapjen më të madhe të zjarrit në sipërfaqet pyjore. Situata mbetet kritike për shkak të kushteve atmosferike dhe rrezikut që zjarri të përfshijë zona më të gjera pyjore.