Një vatër zjarri ka shpërthyer në zonën e Nikaj-Mërturit në Tropojë, duke përfshirë masivet pyjore me pemë mbi 100-vjeçare në Lugun e Ndërmajës. Kjo situatë vjen pas një periudhe të gjatë me temperatura të larta dhe disa vatra zjarri në vende të ndryshme të Shqipërisë, ndërsa Tropoja deri tani kishte qenë e qetë. Flakët përbëjnë një kërcënim serioz për pyjet shekullore të zonës, duke bërë të domosdoshme ndërhyrjen e shpejtë dhe angazhimin e mjeteve dhe forcave të emergjencës. Deputeti i Partisë Demokratike, Isuf Çelaj, ka bërë thirrje publike për mobilizim të menjëhershëm të institucioneve përgjegjëse për të ndaluar përhapjen e zjarrit dhe për të mbrojtur këtë pasuri natyrore.