Një zjarr ka shpërthyer në Parkun Kombëtar “Sharri”, nën majën e Vrtopit, në një lartësi prej rreth 2,500 metrash mbi nivelin e detit. Për shkak të terrenit të vështirë dhe të paarritshëm, ekipet e emergjencave, policisë, zjarrfikësve dhe përfaqësuesve të parkut po veprojnë në mënyrë të koordinuar për të parandaluar përhapjen e flakëve. Për të monitoruar situatën dhe për të ndihmuar në menaxhimin e zjarrit, është angazhuar edhe një ekip me dronë që përcjell gjendjen në terren. Kryetari i Prizrenit, Shaqir Totaj, ka bërë apel të fortë për qytetarët që të shmangin ndezjen e zjarreve në ambiente të hapura, duke theksuar se sjellja e papërgjegjshme rrezikon natyrën, pyjet, jetën dhe pasurinë e banorëve, dhe është e dënueshme me ligj.