Një avion me 33 pasagjerë dhe 3 anëtarë ekuipazhi, i nisur nga ishulli grek i Rodosit drejt Karpathosit, u detyrua të kthehej menjëherë në aeroport pas një defekti në njërin prej motorëve. Gjatë fluturimit u pa tym dhe për disa çaste edhe flakë që dilnin nga motori, gjë që shkaktoi ankth tek udhëtarët. Piloti çaktivizoi motorin me problem dhe vazhdoi fluturimin me motorin tjetër, duke u ulur në mënyrë të sigurt në Rodos, ku zjarrfikësit dhe emergjencat ishin në gatishmëri, por nuk u desh ndërhyrje. Kompania AEGEAN konfirmoi se incidenti ndodhi për shkak të një sinjali për problem në sistemin e vajit të motorit, ndërsa pasagjerët u transportuan me avion tjetër për të vazhduar udhëtimin e tyre, dhe shkaku i saktë do të përcaktohet nga kontrolli teknik.