Një 25-vjeçar nga Deçani është vënë nën hetim nga Policia e Kosovës pas publikimit të një fotografie në Facebook ku shfaqej me armë në dorë. Policia e identifikoi dhe intervistoi të riun, i cili deklaroi se fotografia ishte realizuar në vitin 2023 gjatë një shëtitjeje në Bjeshkën e Baballoqit dhe se arma nuk i përkiste atij, por një personi të panjohur. Me urdhër të Prokurorit kujdestar në Pejë, ndaj tij është iniciuar procedurë për mbajtje të paautorizuar të armëve, ndërsa pas intervistimit ai u lirua në procedurë të rregullt. Hetimet vazhdojnë për të sqaruar rrethanat dhe për të identifikuar pronarin e armës së shfaqur në fotografi.