Gjatë procesit të votimit në shkollën “Jovan Cvijiq” në Zubin Potok, një qytetar serb dyshohet se ka fotografuar fletëvotimin, një veprim i ndaluar nga rregullat zgjedhore. Ai kishte shkaktuar shqetësime që nga hyrja në qendrën e votimit, duke përdorur telefonin celular dhe duke provokuar brenda ambienteve. Kryesuesi i vendvotimit nuk e lejoi qytetarin të përfundojë votimin dhe për pasojë ai u largua nga qendra, ndërsa Policia e Kosovës ndërhyri dhe kontrolloi telefonin e tij. Fotografia u fshi nga pajisja, dhe nuk u gjetën prova të mjaftueshme për masa ligjore, ndërsa procesi zgjedhor vazhdoi normalisht pa ndërprerje.