Instituti Kombëtar i Shëndetësisë Publike të Kosovës ka raportuar një rritje të ndjeshme të rasteve me fruth, duke arritur në 112 të infektuar deri më 10 gusht, nga 62 raste që ishin regjistruar më 10 korrik. Vetëm gjatë javës së fundit janë konfirmuar 13 raste të reja, ndërsa gjatë muajit të fundit janë regjistruar 50 raste shtesë, me Prishtinën dhe Fushë-Kosovën si zonat më të prekura. Për të frenuar përhapjen, ekipet e vaksinimit kanë intensifikuar aktivitetet në komunat më të goditura, duke vaksinuar 147 fëmijë me vonesa në kalendarin e vaksinimit. IKShPK apelon për angazhim të përbashkët të institucioneve, profesionistëve shëndetësorë dhe komunitetit, duke theksuar se vaksinimi mbetet masa më efektive për parandalimin e fruthit dhe mbrojtjen e shëndetit publik.