Në Kosovë janë regjistruar tetë raste të konfirmuara me fruth, prej të cilave pesë pacientë po trajtohen aktualisht në Klinikën Infektive të QKUK-së. Një prej këtyre pacientëve ka pësuar një komplikim të rëndë në sistemin respirator, pneumotoraks, dhe ka qenë i shtruar në mjekim intensiv në klinikën e pediatrisë para se të kthehej për trajtim të mëtejshëm në Infektivë. Drejtoresha e Klinikës Infektive, Vera Berisha-Ndrejaj, theksoi se rastet janë të shpërndara në disa qytete dhe sëmundja është shumë kontagjioze, duke u përhapur lehtësisht, sidomos në ambiente të mbyllura. Ajo gjithashtu vuri në dukje se fruthi nuk është shfaqur në periudha të gjata më parë, por tani po shfaqet me raste sporadike dhe me komplikime serioze.