Forca e Sigurisë së Kosovës organizoi ceremoninë e përfundimit të Kursit për Rreshtermajor “Gjenerata 03-2026” në Komandën e Doktrinës dhe Stërvitjes. Ky kurs përfaqëson një nivel të avancuar profesional për nënoficerët dhe synon përgatitjen e tyre për përgjegjësi më të larta brenda strukturës së lidershipit të trupës. Programi përfshiu module të ndryshme arsimore dhe profesionale, duke përfshirë studimet profesionale, udhëheqjen, menaxhimin e forcës dhe operacionet ushtarake dhe ndërinstitucionale. Përmes këtij kursi, kursantët kanë thelluar njohuritë dhe aftësitë e lidershipit, duke u përgatitur për të mbështetur komandantët në planifikim, menaxhim dhe realizim detyrash, duke kontribuar në forcimin dhe avancimin e kapaciteteve të Forcës së Sigurisë së Kosovës.