Koalicioni i OJQ-ve për Mbrojtjen e Fëmijëve në Kosovë (KOMF) i është bashkuar fushatës së Aksionit për Nëna dhe Fëmijë (AMC) dhe Tip1omël për të kërkuar përfshirjen e Monitoruesve të Vazhdueshëm të Glukozës (CGM) dhe pompave të insulinës në Listën e Pajisjeve Mjekësore Esenciale të Kosovës. Kjo nismë synon që asnjë fëmijë me diabet tip 1 të mos mbetet pa pajisjet e nevojshme për shkak të kostos, duke garantuar qasje të barabartë në kujdesin modern. Fëmijët me diabet tip 1 kanë nevojë për terapi të vazhdueshme dhe menaxhim të niveleve të glukozës, ku teknologjitë si CGM dhe pompat e insulinës ndihmojnë në uljen e rrezikut të komplikimeve dhe lehtësojnë trajtimin e përditshëm. Mbështetja e KOMF-it fuqizon thirrjen drejtuar Qeverisë së Kosovës dhe autoriteteve shëndetësore për të siguruar që gjendja financiare e familjes të mos jetë pengesë për qasjen në këto pajisje jetësore.