Një ngjarje e rëndë ka tronditur futbollin brazilian, ku Nicolas Bosshardt, futbollisti i ri i klubit São Paulos, është nën hetim pasi dyshohet se ka përplasur për vdekje një këmbësor 84-vjeçar gjatë natës. Autoritetet po hetojnë gjithashtu mundësinë që 19-vjeçari të ketë qenë duke marrë pjesë në gara të paligjshme me makina në momentin e aksidentit. Policia ka nisur menjëherë hetimet për të zbardhur rrethanat e ngjarjes, ndërsa klubi nuk ka dhënë ende një deklaratë zyrtare. Ngjarja ka shkaktuar reagime të shumta në Brazil, duke rikthyer në vëmendje problematikën e garave ilegale dhe rrezikun që ato paraqesin për sigurinë rrugore.