Në Zubin Potok po vazhdojnë gërmimet në lokacionet e dyshuara për varre masive, ku janë gjetur eshtra që po i nënshtrohen ekzaminimeve mjeko-ligjore në Institutin e Mjekësisë Ligjore të Kosovës. Pas këtij procesi, mostrat biologjike dërgohen për testim të ADN-së në laboratorin e Komisionit Ndërkombëtar për Persona të Zhdukur, me seli në Holandë, për të siguruar identifikimin e tyre. Sipas Kushtrim Garës nga Komisioni Qeveritar për Persona të Zhdukur, rezultatet e këtyre analizave priten brenda 4 deri në 6 javëve dhe do të trajtohen me prioritet nga institucionet kosovare. Ky proces është thelbësor për zbardhjen e fatit të personave të zhdukur dhe për avancimin e drejtësisë në këtë çështje.