Ministri në detyrë i Shëndetësisë, Arben Vitia, ka njoftuar se Hysni Mehani ndodhet në gjendje stabile pas sulmit fizik të rëndë që pësoi në Skenderaj. Ai vizitoi Mehanin në Spitalin e Mitrovicës dhe bëri të ditur se janë kryer të gjitha ekzaminimet e nevojshme, ndërsa nesër do të kryhen edhe kontrolle shtesë për të monitoruar gjendjen e tij. Vitia theksoi se dhuna nuk duhet të përdoret si mjet komunikimi në një shoqëri demokratike dhe dënoi sulmet fizike ndaj përfaqësuesve politikë dhe qytetarëve, duke i cilësuar ato si të papranueshme dhe të dëmshme për frymën demokratike të vendit. Ai gjithashtu shprehu mbështetjen e tij për Mehanin dhe nënvizoi nevojën për përballje me ide dhe argumente në vend të dhunës dhe frikësimit.