Harbin Vitija, i njohur si “Plaku”, vazhdon trajtimin në Qendrën Klinike Universitare të Kosovës pas plagosjes së rëndë më 14 maj në lagjen “Bregu i Diellit”. Ai u qëllua në kokë brenda një kafiterie nga dy persona të maskuar dhe të armatosur, duke marrë plagë të rënda që e vunë në rrezik për jetën. Pas qëndrimit në kujdes intensiv dhe gjendjes kritike, drejtori i Klinikës së Neurokirurgjisë, Besnik Elshani, konfirmoi se gjendja e tij tani është stabile dhe jashtë rrezikut për jetë. Aktualisht, “Plaku” është transferuar në Neurokirurgji dhe po planifikohet të nisë terapi fizikale për rikuperim gradual.