Këngëtari i njohur kosovar Besart Kelmendi, i njohur si Gjesti, është liruar nga paraburgimi pas një periudhe prej një muaji, gjatë së cilës ishte ndaluar për shkak të dyshimeve për kryerjen e tri veprave penale: kanosje, asgjësim apo dëmtim të pasurisë dhe mbajtje të paautorizuar të armëve. Gjykata Themelore në Prishtinë kishte caktuar masën e paraburgimit, duke u bazuar në kërkesën e Prokurorisë, por më pas mbrojtja e tij kundërshtoi këtë masë, duke argumentuar mungesën e rrezikut për përsëritje të veprës penale. Gjatë seancës për lirimin nga paraburgimi, Gjesti deklaroi se veprimet e tij i kishte kryer në gjendje emocionale dhe kërkoi falje nga gjykata, prokuroria dhe pala e dëmtuar. Avokati i tij, Artan Qerkini, bëri të ditur lirimin, duke konfirmuar se këngëtari është liruar nga paraburgimi, ndërsa çështja do të vazhdojë në rrugë ligjore.