Një qytetar ka deklaruar se gjatë kalimit në pikën kufitare mes Kosovës dhe Serbisë është ndaluar nga policia serbe dhe është gjobitur me 600 euro për shkak të fotografive në telefonin e tij që përmbanin emblemën e Ushtrisë Çlirimtare të Kosovës (UÇK). Ai ka treguar në emisionin ‘Fol me Ari’ në Klan Kosova FM se telefoni i është marrë për kontroll dhe më pas është ndëshkuar me gjobë. Sipas tij, ky nuk është një rast i izoluar, pasi edhe persona të tjerë janë përballur me masa të ngjashme, me gjoba që në disa raste kanë arritur deri në 4 mijë euro. Ai ka dërguar edhe fotografitë për të cilat pretendon se është ndëshkuar, duke nxjerrë në pah shqetësimet për kontrollin dhe ndëshkimin e qytetarëve në kufi për shkak të përmbajtjes së telefonave të tyre.