Inspektorati i Komunës së Prishtinës ka shqiptuar një gjobë prej 500 eurosh ndaj një qytetari të kapur në flagrancë duke hedhur mbeturina në mënyrë të paligjshme në hapësira publike. Rasti u evidentua gjatë orëve të vona të natës në kuadër të kontrolleve të rregullta të Drejtorisë së Shërbimeve Publike dhe Inspektoratit. Komuna thekson se aksionet për menaxhimin e mbeturinave dhe ruajtjen e pastërtisë në lagjet e kryeqytetit po vazhdojnë intensivisht çdo ditë. Megjithatë, edhe pse ka përpjekje të vazhdueshme, disa qytetarë vazhdojnë të dëmtojnë mjedisin me hedhje të paligjshme të mbeturinave, ndaj kontrollet do të shtohen dhe shkelësit do të ndëshkohen sipas ligjit.