Gjykata e Apelit ka refuzuar ankesën e ndërmarrjes “Trepça” SH.A. dhe ka konfirmuar vendimin e Gjykatës Themelore në Mitrovicë, duke urdhëruar rikthimin e Gëzim Mustafës në pozitën e drejtorit të Flotacionit në njësinë biznesore Miniera me Flotacion “Trepça-Stantërg”. Mustafa ishte transferuar në mënyrë të kundërligjshme në pozitën e inxhinierit në njësinë tjetër, pa u zhvilluar asnjë procedurë disiplinore për menaxhimin e tij. Gjykata ka vlerësuar se “Trepça” nuk ka arritur të provojë me dokumente të vlefshme bazën ligjore të këtij transferimi dhe se vendimi ishte marrë pa kompetencë dhe pa argumente të mjaftueshme. Përveç rikthimit në pozitën e mëparshme, ndërmarrja është e detyruar të paguajë Mustafës edhe diferencën në pagë dhe shpenzimet e procedurës kontestimore, duke e detyruar kështu “Trepçën” të respektojë kontratën dhe ligjin në afat prej shtatë ditësh.