Gjykata e Apelit ka lënë në fuqi aktakuzën ndaj Faruk Mujkës dhe Hysen Muzliukajt, të cilët akuzohen për korrupsion dhe keqpërdorim të detyrës zyrtare në rastin e këmbimit të pronës së ish-Bankosit në Mitrovicë. Mujka ngarkohet edhe për mosdeklarim të 60 mijë eurove të sekuestruara në shtëpinë e tij, duke mos i raportuar ato në deklaratën e pasurisë. Mbrojtja kishte kërkuar hedhjen poshtë të aktakuzës dhe shpalljen e provave si të papranueshme, por Apeli i ka refuzuar këto pretendime duke vlerësuar se ekzistojnë prova të mjaftueshme për të vazhduar procedurën penale. Gjykata thekson se vlerësimi përfundimtar i fajësisë do të bëhet në shqyrtimin gjyqësor pas administrimit të provave.