Gjykata e Lartë e Shqipërisë ka zbardhur vendimin unifikues që ndryshon praktikën e caktimit të masave të sigurimit personal, duke vendosur se “arresti në burg” duhet të jetë masa e fundit dhe jo një praktikë automatike. Sipas këtij vendimi, gjykatat janë të detyruara të analizojnë dhe arsyetojnë në mënyrë të detajuar pse masat alternative, si arresti në shtëpi apo detyrimi për paraqitje, nuk janë të mjaftueshme për të garantuar sigurinë e procedimit penal. Barra e provës për rrezikshmërinë dhe nevojën për “arrestit në burg” i kalon prokurorisë, e cila duhet të paraqesë argumente konkrete dhe të mbështetura në fakte. Ky ndryshim synon të përputhë praktikën gjyqësore shqiptare me standardet kushtetuese dhe ato të Gjykatës Europiane për të Drejtat e Njeriut, duke mbrojtur më mirë lirinë e individit dhe duke kufizuar përdorimin e masave më të rënda të sigurimit personal.