Gjykata e Lartë ka vendosur të rikthejë për rigjykim kërkesën e ish-presidentit Ilir Meta për lirim nga burgu, duke urdhëruar që çështja të shqyrtohet sërish nga Gjykata e Apelit. Më parë, Apeli kishte refuzuar kërkesën e Metës më 22 korrik të vitit të kaluar, duke argumentuar mungesën e bazës ligjore për ankimimin e kërkesave për zëvendësim mase. Vendimi i Gjykatës së Lartë prish kështu vendimin e Apelit të Posaçëm dhe kërkon që i njëjti trup gjykues të shqyrtojë sërish çështjen. Aktualisht, Ilir Meta vazhdon të jetë në burg, ku akuzohet nga Prokuroria e Posaçme për tri vepra penale: korrupsion pasiv, mosdeklarim dhe fshehje pasurie, si dhe pastrim parash.