Në Gjykatën Themelore në Mitrovicë vazhdon gjykimi ndaj Bleon Dibranit, i akuzuar për vrasjen e 19-vjeçarit Ardit Zymeri më 23 mars 2025 në Vushtrri. Pas rikonstruktimit të vendit të ngjarjes dhe matjeve të kryera nga ekspertët e Forenzikës, gjykata ka kërkuar raport plotësues dhe sqarime lidhur me distancën mes të pandehurit dhe viktimës në momentin e të shtënave. Mbrojtja ka kërkuar të dëgjohet kryetari i komisionit vlerësues të Institutit të Psikiatrisë Forenzike, kërkesë që është aprovuar nga trupi gjykues, ndërsa prokuroria dhe mbrojtësit e viktimave kanë kundërshtuar përfshirjen e ekspertëve shtesë. Seanca e radhës është caktuar për më 22 maj 2026, ku do të dëgjohen sërish ekspertët për të sqaruar rrethanat e ngjarjes dhe për të analizuar raportet e ekspertizës mjeko-ligjore dhe forenzike.